image image image image image
جمهور رئیس غني: تروریزم زموږ د عصر عمده ننګونه ده او له هغه سره مبارزه اوږدمهاله تعهد ته اړتیا لري
د افغانستان د اسلامي جمهوریت جمهور رئیس محمد اشرف غني نن ماښام د مونیخ دري پنځوسم امنیتي کنفرانس کې وینا وکړه وې ویل، د تروریزم پر ضد مبارزه د نړۍ، وچې (قارې)، اسلامي نړۍ، سیمې اوپه ملي کچه تمرکز ته اړتیا لري.

په دې کنفرانس کې چې د المان هېواد په مونیخ ښار کې جوړ شو، په هغه کې پرجمهور رئیس غني سربيره د نړۍ له ۳۰ څخه د زیاتو هېوادونو مشرانو او ۸۰ د بهرنیو چارو او دفاع وزیرانو ګډون درلود، جمهور رئیس غني زیاته کړه، افغانستان له تروریزم سره د مبارزۍ په لومړۍ کرښه کې قرار لري او له ۲۰ تروریستي ډلو سره د مبارزې په حال کې دی چې د امریکا متحده ایالات او د ملګرو ملتونو سازمان هغه د تروریستي ډلو په توګه پېژندلې دي. دا مبارزه د تروریستي ډلو په ضد یوازې د افغانستان د ازادۍ نه، بلکې د نړیوال امنیت لپاره وه.       

هغه وویل: تروریزم له ټولنیزو شبکو، ټکنولوژیکي شبکو او جرمي اقتصاد څخه د جرمي سیاست په خاطر په بین المللي کچه استفاده کوي.

جمهور رئیس څرګنده کړه چې تروریزم سرحد نه پېژني او هیڅ سیمه به د هغه له خطر څخه په امان پاتې نشي.

محمد اشرف غني وویل، د تروریزم په ضد د مبارزې په خاطر موږ یوې اجماع، جامع ستراتیژۍ، د مشروع قوې استعمال، ، د ټولنې د مهمو اقشارو ګډون او د تروریزم د ملاتړو هېوادونو څنډې کولو ته اړتیا لرو.

جمهور رئیس څرګنده کړه: په کابل، کندهار، هلمند او د هېواد نورو سیمو کې چې تروریستي بریدونه او همدارنګه د پاکستان سند ایالت کې برید دا ښیي چې تروریزم ښه او بد نه لري.

د هېواد جمهور رئیس وویل: تروریزم زموږ د عصر عمده ننګونه ده او له هغه سره مبارزه اوږدمهاله تعهد ته اړتیا لري. هغه زیاته کړه: د تروریزم د مختلفو اشکالو درک او له هغه سره مبارزه چې د را څرګندېدو په حال کې دي ښایي سخت وي.

جمهور رئیس وویل: د دولتونو له لوري د تروریزم تمویل او د دولتونو کمزوري او په ځانګړې توګه اداري فساد دا پدیده په دې قادروي چې خپل فعالیت پراخه کړي.

جمهور رئیس غني څرګنده کړه: موږ له تروریزم سره په مبارزه کې کامیابۍ ته رسېدلی شو او باید بریالي شو.

جمهور رئیس په دې وینا کې وویل: د موثرې مبارزې او د تروریزم د ودې د مخنیوي لپاره حتمي ده هغه هېوادونه چې تروریزم یې د دولتي سیاست موخو ته د رسېدو وسیله ګرځولې تجرید شي.
جمهور رئیس غني په مونیخ امنیتي کنفرانس کې له یو شمېر نورو لوړ پوړو مقاماتو سره هم وکتل
د افغانستان د اسلامي جمهوریت جمهور رئیس محمد اشرف غني د المان مونیخ ښار کې په مونیخ امنیتي کنفرانس کې د کتنو په لړ کې د ګډون کوونکو هېوادونو ځینو نورو لوړو مقاماتو سره جلا جلا وکتل.

جمهور رئیس محمد اشرف غني د جان مکن په مشرۍ امریکایي سناتورانو په کتنه کې د افغانستان حکومت د پروګرامونو ملاتړ او همکارۍ څخه مننه وکړه.

دې سناتورانو فساد سره د مبارزې او اصلاحاتو راوړلو په برخه کې د افغانستان حکومت د ټینګ تعهد او همدارنګه په دې برخه کې د پام وړ فعالیتونو قدرداني وکړه.

جان مکن هیله څرګنده کړه چې د امریکا نوې اداره په بېلابېلو برخو په ځانګړي ډول په تخنیکي برخه کې له افغانستان سره همکاري وکړي. هغه زیاته کړه، د امریکا د کانګرس غړي د امنیتي او دفاعي ځواکونو د مرستو او امکاناتو د حیف او مل کېدو د مخنیوي په برخه کې د افغانستان د حکومت د اقداماتو هرکلی کوي.

همدارنګه د هېواد جمهور رئیس د بین المللي جزا محکمې عمومي څارنوالې مېرمن فتو بینسودا سره وکتل. د بین المللي جزا محکمې څارنوالې د خشونت پېښو په جریان کې د افغانستان په ملکي قربانیو تاسف څرګند کړ.

هغه د جرایمو په هکله وویل، ځینې کړنې چې زورمندان یې ترسره کوي، بین المللي قضایي محکمه د هغو مکلفیتونو په دلایلو چې لري یې د افغانستان قضیې ته توجه کوي او له نږدې څخه به یې تعقیب کړي. هغه د افغانستان د حکومت د اصلاحاتو ستاینه هم وکړه.

د بین المللي محکمې څارنوالې وویل چې د بین المللي جزا محکمه به د افغانستان دولت سره  همکاره پاتې شي او د قانوني تسجیلاتو مطابق به عمل وکړي.

جمهور رئیس غني د بین المللي جزا محکمې ملاتړ څخه د مننې په ترڅ کې وویل، په افغانستان کې زرګونه ملکي وګړي د طالبانو او تروریستي ډلو له لوري د ځینو هېوادونو په ملاتړد خشونت د پېښو له امله قرباني کېږي.

د هېواد جمهور رئیس څرګنده کړه، چې د بین المللي جزا محکمه باید د هغو ډلو او هېوادونو پر وړاندې چې د خلکو په وژنه لاس پورې کوي پام وکړي او دا قضیه په جدي ډول تعقیب کړي.

جمهور رئیس د افغانستان د قضائیه قوې استقلالیت ته په اشارې وویل، عدلي او قضایي بنسټونه په بې طرفانه توګه جرمي قضایاوې تعقیبوي او موږ د دې بنسټونو استقلالیت ته پوره درناوی لرو.

جمهور رئیس محمد اشرف غني د قطر د بهرنیو چارو وزیر سره په خپل استوګنځای کې وکتل. دواړو لورو د بېلابېلو موضوعاتو په ځانګړي ډول د همکاریو د انکشاف، د سولې بهیر او قطر کې د طالبانو د دفتر په اړه بحث او خبرې وکړې.

جمهور رئیس غني وویل، عمده بحث دادی چې طالبان له جنګ څخه لاس واخلي او د سولې پروسې سره یو ځای شي. هغوی باید د سولې په پلمه فرصتونه ضایع نه کړي، که تر راتلونکي پسرلي او اوړي پورې د طالبانو چلند کې مثبت بدلون څرګند نه شي او خشونت ته ادامه ورکړي، باید د قطر دفتر د بندولو په ګډون په هغوی باندې تحریمات تطبیق شي.

جمهور رئیس غني وویل، د کندهار د وروستۍ پېښې په هکله زموږ څېړنې ښیي چې طالبان او د هغوی شورا په دې پېښه کې لاس لري، هغوی په ملکي خلکو او د دوست هېوادونو ډیپلوماتانو باندې رحم نه کوي.

جمهور رئیس غني زیاته کړه چې سوله زموږ د هېواد او خلکو له مهمو لومړیتوبونو څخه ده ، خو داسې باید نه وي طالبان د سولې خبرې کوي او په عین حال کې جنګ ته هم ادامه ورکړي.

د قطر د بهرنیو چارو وزیر وویل، د خشونت اعمال د توجیه وړ نه دي او موږ په افغانستان کې د سولې او ثبات د تامین لپاره خپلو کوښښونو ته ادامه ورکوو او هغه به  زیات کړو.

جمهور رئیس په خپل استوګنځای کې د چین د بهرنیو چارو وزیر سره په کتنه کې په دوه اړخیزه همکاریو ، د ورېښمو لارې جوړولو، د سولې مذاکراتو بهیر کې د چین د رول او د سولې د څلور اړخیز سند موادو عملي کولو ته د پاکستان د هڅونې په اړه خبرې وکړې.

همدارنګه دواړو لورو تروریزم سره په جدي مبارزه او د افغانستان او چین تر منځ په بېلابېلو برخو کې د مناسباتوپه تحکیم او همکاریو ټینګار وکړ.

جمهور رئیس غني او د جرمني لومړۍ وزیرې انګلا مرکل په مونیخ ښار کې په کتنه کې په سیمه کې د خشونت او تروریزم د خطرونو د زیاتوالي او عمومي اوضاع په اړه مفصل بحث وکړ.

جمهور رئیس غني څرګنده کړه چې په المان کې قانوني محدودیتونه درک کوو. هغه د المان لومړۍ وزیرې څخه وغوښتل چې د هېواد د دوو قول اردوګانو لپاره تخنیکي او روزنیزې مرستې زیاتې کړي.

د المان لومړۍ وزیرې تروریزم سره د مبارزې په برخه کې د افغانستان د امنیتي او دفاعي ځواکونو د قربانۍ او کوښښونو قدرداني وکړه. په دې کتنه کې یې د نورو موضوعاتو تر څنګ د مسلکي روزنیزو پروګرامونو په هکله هم بحث وکړ.

جمهور رئیس غني له مېرمن مرکل څخه وغوښتل چې په مسلکي برخه کې د جي ای زیډ اقدامات په افغانستان کې زیات کړي.

همدارنګه جمهور رئیس غني په تخنیکي برخو کې د المان ښو تجربو ته په اشارې د افغانستان صکوک مطبعه کې د زیاتو ظرفیتونو د ایجاد په برخه کې د هغه هېواد د تجربو د شریکولو غوښتنه وکړه.

په دې کتنه کې چې د المان دفاع وزیر هم حضور درلود د کډوالو د حقونو د تامین په اړه هم بحث وشو. د المان دفاع وزیر وویل، افغانستان سره په بېلابېلو برخو کې تخنیکۍ همکارۍ به وارزول شي.

جمهور رئیس غني وویل، په روان کال کې زیات شمېر افغان کډوال هېواد ته راستانه شول او د افغانستان حکومت کوښښ کوي چې راستنېدونکو ته لازمې اسانتیاوې برابرې کړي.

همدارنګه جمهور رئیس غني او د برتانیا دفاع وزیر په کتنه کې د عمده امنیتي او اقتصادي موضوعاتو په اړه د بحث په ترڅ کې د پاکستان او وروستیو پېښو په اړه بحث او خبرې وکړې. جمهور رئیس غني په دې هکله وویل، یوازینۍ لاره دا ده چې پاکستان د څلور اړخیزې ناستې پرېکړو باندې عمل وکړي چې خشونت کم شي.

د امریکا دفاع وزیر او د هېواد جمهور رئیس په جلا کتنه کې په پام وړ موضوعاتو بحث وکړ. د امریکا دفاع وزیر له جمهور رئیس غني څخه له دې امله مننه وکړه چې تل په افغانستان کې د امریکا قربانۍ یادوې. دواړو لورو تروریزم سره د ګډې مبارزې په اړه هم بحث وکړ. 

جمهور رئیس غني افغانستان سره بېلا بېلو برخو کې په ځانګړي ډول د افغان امنیتي او دفاعي ځواکونو سره د امریکا متحده ایالتونو د همکارۍ مننه وکړه. دواړو لورو د افغانستان د امنیتي سکتور د څلور کلن پلان په اړه لنډې خبرې وکړې.

د امریکا دفاع وزیر څرګنده کړه چې د افغانستان په اړه د جنرال نیکولسن په وروستیو څرګندونو یې غور کړی او د هغه موندنې به وارزوي. هغه زیاته کړه، افغانستان د لومړي هېواد په توګه چې تروریزم سره د مبارزې په لومړۍ کرښه کې قرار لري وتوانېد چې دموکراتیک ارزښتونه په ښه توګه خوندي او له هغو څخه دفاع وکړي.
جمهور رئیس غني د امریکا متحده ایالتونو د جمهور رئیس مرستیال سره وکتل
د افغانستان د اسلامي جمهوریت جمهور رئیس محمد اشرف غني نن د المان مونیخ ښار کې د امریکا متحده ایالتونو د جمهور رئیس مرستیال ښاغلي مایک پنس سره وکتل.

په دې کتنه کې د هېواد جمهور رئیس او د امریکا متحده ایالتونو د جمهور رئیس مرستیال په امنیتي او اقتصادي برخو کې د همکاریو د پراخولو، د سیمې د مسایلو او پام وړ موضوعاتو په اړه بحث او خبرې وکړې.

ښاغلي پنس وویل، افغانستان زموږ لپاره ځانګړی ارزښت لري او د امریکا متحده ایالتونه د افغانستان خلکو او دولت سره خپل ملاتړ او همکاریو ته ادامه ورکوي. هغه د افغانستان د امنیتي او دفاعي ځواکونو د قربانۍ او شهامت ستاینه هم وکړه.

جمهور رئیس غني له افغانستان سره په بېلابېلو برخو کې د امریکا متحده ایالتونو د مرستې او همکاریو او همدارنګه په افغانستان کې د امریکایي ځواکونو د فداکارۍ قدرداني او مننه وکړه.

دواړو لورو د امنیتي وضعیت، د سیمه ییز او بین المللي تروریزم د عمده ننګونو، د تروریزم د اوسنیو او اوږدمهاله خطرونو او د تروریزم د دولتي ملاتړو په ګډون د هغوی د منطقوي ملاتړو په اړه خبرې وکړې.

همدارنګه دواړو لورو د افغانستان د امنیتي سکتور د څلور کلن پلان او د هېواد د راتلونکو ټاکنو لپاره د تیاریو په اړه خبرې وکړې.

د امریکا د متحده ایالتونو د جمهور رئیس مرستیال د افغانستان لپاره د امریکا روزنیزو ځواکونو د زیاتوالي په هکله وویل چې د هېواد ارزونې یې په دې هکله جریان لري.

جمهور رئیس محمد اشرف غني څرګنده کړه، د افغانستان جنګ داخلي جنګ نه دی، بلکې دا هېواد د نړیوال امنیت او تروریزم سره د مبارزې په لومړۍ کرښه کې قرار لري. هغه زیاته کړه، چې افغانستان په سیمه کې تروریزم سره د مبارزې لپاره ټول لازم ظرفیتونه لري او د سیمه ییز او بین المللي تروریزم خطر په زیاتوالي سره کولای شي د دواړو هېوادونو تر منځ د همکاریو له لارې په دې برخه کې په موثره توګه عمل وکړي.

د هېواد جمهور رئیس همدارنګه د افغانستان د هوایي ځواک د ظرفیت د زیاتوالي په اړه خبرې وکړې وې ویل، په دې اړه د دې ځواکونو زیات تجهیز او پیاوړتیا ته اړتیا ده.

د هېواد جمهور رئیس د امریکا متحده ایالتونو د جمهور رئیس مرستیال ته افغانستان ته د سفر بلنه ورکړه. ښاغلي پنس هم د افغانستان جمهور رئیس ته امریکا ته د سفربلنه ورکړه.
جمهوررئیس غني مونیخ امنیتي کنفرانس کې د هېوادونو له یو شمېر مشرانو سره وکتل
د افغانستان د اسلامي جمهوریت جمهوررئیس محمداشرف غني المان ته د سفر پر مهال او د مونیخ امنیتي کنفرانس په څنډه کې د هېوادونو یو شمېر ګډون کوونکو مشرانو او لوړ پوړو چارواکو سره جلا جلا کتنې او خبرې وکړې.

جمهوررئیس غني او د المان صدراعظمې انګلا مرکل د کتنې پر مهال په بېلابېلو برخو کې د دواړو هېوادونو پر همکاریو، د افغانستان او المان ترمنځ د اړیکو په پراختیا او د سیمې پر مهمو مسائلو بحث او خبرې وکړې. په دغه کتنه کې جمهوررئیس غني په بېلابېلو برخو کې افغانستان سره د المان له همکاریو مننه وکړه او دواړو غاړو د دغو همکاریو پر دوام ټینګار وکړ.

جمهوررئیس غني د اذربایجان له جمهوررئیس الهام حیدرعلي‌یوف سره پر بېلابېلو موضوعاتو په ځانګړي ډول امنیتي او اقتصادي همکاریو، د سمنټو په برخه کې په پانګونې، نساجۍ او د بندونو په جوړولو خبرې وکړي.

په دغه کتنه کې د دواړو هېوادونو جمهور رئیسانو موافقه وکړه چې افغانستان دې ګمرکي تعرفو کې شامل شي، تر څو د ترانزیټ او د توکو له صادراتو څخه د نورو هېوادونو لکه اذربایجان، کروشیا او ترکیې په څېر له یو شان بیو ګټه واخلي.

دواړو غاړو په بېلابېلو ډګرونو کې د افغانستان او اذربایجان ترمنځ په ګډو همکاریو خبرې وکړې او د دواړو هېوادونو ترمنځ یې د اړیکو په لا ټینګېدو ټینګار وکړ.


د افغانستان د اسلامي جمهوریت جمهوررئیس او د جورجیا صدراعظم جورجي کویریک شوېلي په مونیخ ښار کې د کتنې پرمهال په بېلابېلو په ځانګړي ډول د سوداګرۍ او ترانزیټ په موضوعاتو بحث او خبرې وکړې او د دواړو هېوادونو ترمنځ یې د همکاریو په پراختیا ټینګار وکړ.

په دغه کتنه کې، جمهوررئیس غني وویل، افغانستان او جورجیا د لاجوردو لارې یوه برخه ده، باید له دغې لارې څخه ګټه اخیستل چټک شي. هغه زیاته کړه، د افغانستان رېل پټلۍ به د هېواد له لویدځ څخه ژر ترکمنستان لوري ته ګټې اخيستو ته چمتو شي چې د لاجوردو لارې څخه د ښې ګټې اخیستو زمینه برابره کړي.

په دغه سفر کې جمهوررئیس محمداشرف غني د کروشیا جمهور رئیسې مېرمن کولینډا ګروابار کیتارووک سره هم وکتل. د دواړو هېوادونو مشرانو په بېلابېلو برخو په ځانګړي ډول د خصوصي سکتور په پرمختیا کې د همکاریو په دوام خبرې وکړې.

د کروشیا جمهور رئیسې افغانستان سره د خپل هېواد د همکاریو او مرستې په دوام په ځانګړي ډول د غوڅ ماموریت ځواکونو په چوکاټ کې ډاډ ورکړ او د بې سرپرسته ماشومانو د زده کړې په برخه کې یې د همکارۍ ژمنه وکړه.

هغې جمهوررئیس غني ته بلنه ورکړه چې کروشیا ته سفر وکړي. د هېواد جمهوررئیس د کروشیا د جمهورې رئیسې له بلنې څخه په مننې وویل، په یو مناسب وخت کې به له دغه هېواده لیدنه وکړي.

جمهوررئیس محمداشرف غني د امریکا له دفاع وزیر جیمز مټیس سره وکتل. دواړو لوریو پر بېلابېلو موضوعاتو په ځانګړي ډول د افغانستان د امنیتي او دفاعي ځواکونو په تمویل او تجهیز همدارنګه تروریزم سره په مبارزې، سیمه‌ییزو او د علاقې وړ موضوعاتو بحث او خبرې وکړې.

همدارنګه د افغانستان د اسلامي جمهوریت جمهوررئیس خپل استوګنځي کې د برتانیې دفاع وزیر مایکل فالون سره وکتل، دواړو لوریو د دواړو هېوادونو ترمنځ په همکاریو او د علاقې وړ موضوعاتو بحث او خبرې وکړې.

د هېواد جمهوررئیس محمداشرف غني د ناروې شاهي هېواد صدراعظم ارنا سولبرګ سره وکتل او دواړو لوریو پر امنیت، سولې، ثبات او د علاقې وړ موضوعاتو بحث او خبرې وکړې.

ښاغلي سولبرګ د افغانستان حکومت کړنې وستایلې وې ویل، دا چې افغانستان په یو ښه لوري روان دی، خوښ یم.

د هېواد جمهوررئیس افغانستان سره د ناروي له پرمختیايي همکاریو څخه مننه وکړه وې ویل، دغه هېواد د اوبو په مهارولو، د بندونو په جوړولو، د برېښنا په تولید او مسلکي زده کړو کې ګټورې تجربې لري. هغه د ناروي له صدراعظم وغوښتل چې په دغه برخه کې افغانستان سره خپلې تجربې شریکې کړي.

د ناروې شاهي هېواد صدراعظم افغانستان سره د خپل هېواد د همکاریو په ځانګړي ډول د اقتصاد په برخه کې ډاډ ورکړ وې ویل، چمتو یوو چې د ښځو د اقتصادي ځواکمنتیا برخه کې همکاري وکړو.

جمهوررئیس غني د سولې مذاکراتو بهیر ته په اشارې وویل، د افغانستان حکومت د سولې او خبرو دروازې پرانیستي دي چې له هغو نه په ګټې اخیستو حزب اسلامي د بین الافغاني مذاکراتو د ترسره کولو وروسته له دغه بهیر سره یو ځای شو، خو طالبانو لا تر اوسه له دغه فرصته ګټه نه ده اخیستې.

د هېواد جمهوررئیس په ټینګارسره وویل، د افغانستان حکومت هغو تروریستي ډلو سره چې د خلکو په وژنې لاس پورې کوي، مذاکره نه کوي. هغه زیاته کړه، سره له دې چې افغانستان د سولې او ثبات پلوي دی، خو داسې عوامل لا هم شته چې په سیمه کې سوله د ځان په ګټه نه ګڼي.

د ناروي د شاهي هېواد صدراعظم تروریزم سره په مبارزې ټینګار وکړ او څرګنده یې کړه، تروریستي ډلې په ځانګړي ډول داعش په افغانستان کې پر تخریبي فعالیتونو بوخت دی او هره ورځ دغه هېواد کې ناامنۍ زیاتوي.

په دغه کتنه کې چې د یاد هېواد دفاع وزیر هم حضور درلود، د افغانستان د امنیتي او دفاعي ځواکونو د کلکې روحیې او په ځانګړي ډول د خاصو ځواکونو ستاینه وکړه، وې ویل، په افغانستان کې د ناروي ځواکونه په اکثره مواردو کې له دوی زده کړه کوي. دواړو لوریو د همکاریو په پراختیا هم ټینګار وکړ.

جمهوررئیس محمداشرف غني په خپل استوګنځي کې د امریکې د متحدو ایالتونو د بهرنیو چارو له پخوانۍ وزیرې او د "البرایټ ګروپ" رئیسې میډلین البرایټ سره وکتل. دواړو لوریو د پانګونې د جذب په ځانګړي ډول د افغانستان د کانونو  د استخراج او تولید، همدارنګه د همکاریو او پرمختیاوو د داسې لارو لټولو چې وکولای شي دوامدار کار او اغیزناکه پانګونه رامنځته کړي، خبرې وکړې.

جمهوررئیس غني د مایکروسافټ کمپنۍ رئیس بیل ګیټس سره په کتنه کې د پولیو د له منځه وړلو او د افغانستان په ټاکنو کې د معاصرۍ ټکنالوجۍ څخه د ګټې اخیستو په برخه کې د مرستې په اړه بحث او خبرې وکړې.
ملي امنیت شورا د جمهوررئیس غني په مشرۍ غونډه وکړه
د افغانستان د اسلامي جمهوریت د جمهوررئیس محمداشرف غني په مشرۍ پرون ماښام په ارګ کې د ملي امنیت شورا غونډه جوړه شوه.

غونډې د خلکو د امنیت او سوکالۍ دښمنانو پر وړاندې د هېواد د دفاعي او امنیتي ځواکونو د سرښندنو او  اتلولیو څخه د مننې او ستاینې تر څنګ د هلمند، کندز، بغلان، ننګرهار، روزګان او نورو ولایتونو د اونیز وضعیت په ارزونې سره د دښمنانو د نابودولو په موخه لازمې لارښوونې صادرې کړې.

د ملي امنیت شورا غونډې د هېواد د اونیز وضعیت له ارزونې وروسته، د وسایطو د ثبت او راجستر په طرزالعمل (د بې اسنادو وسایطو په ګډون) او د متصرفینو په بایومیټریک بحث وکړ او په پرنسیپ کې یې تائید کړ.

دغه سند چې د ملي امنیت شورا دفتر له اړوندو ادارو سره په ګډې همغږۍ تنظیم او چمتو کړی دی، پر ټولو وسایطو د تطبیق وړ دی او امنیتي ادارو ته واک ورکوي چې له قید او شرط پرته متصرفین مکلف کړي چې خپل وسایط راجستر او مالکان یې بایومیټریک کړي. 

په دغه غونډه کې، انتحاري پېښو کې د ناوړه ګټه‌اخیستو د مخنیوي په خاطر د وسایطو ثبت او راجستر مهم وبلل شو او یادونه وشوه چې دا موضوع د وسایطو او چلوونکو د هویت په پيژندو کې مرسته کوي. غونډې د کورنیو چارو او مخابراتو وزارتونه، همدارنګه په تخنیکي چارو کې د جمهوررئیس سلاکار او د ملي امنیت شورا دفتر موظف کړل چې د دوو اونیو په اوږدو کې دې په دغې برخه کې تطبیقي او اجرايي پلان ترتیب کړي.

د غونډې په پای کې، د مظنونینو او متهمینو د استرداد او همدارنګه پر حبس محکوم شویو د انتقال په مقررې هر اړخیز بحث او خبرې وشوې.

دا مقرره د مظنونینو، متهمینو او محکومینو د استرداد په برخه کې د همیشنۍ او ګډې همکارۍ د لا ښه دوام او د اوسنیو مناسباتو د تحکیم، د نورو هېوادونو د محبوسینو د استرداد او انتقال په شرایطو کې د اسانتیا او د هېواد اتباعو په هکله د بالمثله مطالبې په منظور ترتیب شوې ده.

غونډې څرګنده کړه، د هېواد ځیني اوسېدونکي په ځینو هېوادونو کې د بېلابېلو دلایلو په اساس زندانیان دي چې یاد طرزالعمل د هغوی په انتقال کې د اسانتیاوو د رامنځته کولو په خاطر چمتو شوی دی چې له مخې به یې د دواړو خواوو د مظنونینو، متهمینو او پر حبس محکوم شویو بشري حقونه تامین او وساتل شي.

غونډې د کابینې او د عدلي او قضايي کمېټې بحثونو ته په پام، د ګټورو نظریاتو له وړاندې کولو وروسته یاده مقرره تصویب کړه او عدلیې وزارت ته یې لارښوونه وکړه چې د یادې مقررې پړاوونه بشپړ او رسمي جریده کې دې خپره کړي.

چاپي خپرونې

  • خبرپاڼه
  • مجله
  • ګډون وکړﺉ
faceBook icon twitter icon flicker icon youtube icon