ویډیو

۱۳۹۶ مالي کال کې د صادراتو او ملي عوایدو کچه لوړه شوې

 

چاپي خپرونې

  • خبرپاڼه


خبرپاڼه ۲۰ مه ګڼه

faceBook icon twitter icon flicker icon youtube icon
image image image image
ځینې وختونه له اساسي قانونه د سرغړونې پښې لویې ښودل کېږي
اساسي قانون د هر هیواد د ملي یووالي او ثبات ساتندوی دی او هغه څه چې نن په افغانستان کې د دولت او ملت جوړونې په نوم یادېږي اساسي قانون یې د رامنځته کولو او تنظیمولو دنده په غاړه لري او د عملي کولو لپاره یې زمینه برابره کړې ده.
د ولسمشر دوهم مرستیال جلالتمآب محمد سرور دانش د سه شنبې په ورځ د روان کال د مرغومي په ۱۹ نېټه د حکومت د اطلاعاتو او رسنیو په مرکز کې د اساسي قانون د تصویب د څوارلسمې کلیزې په تړاو جوړې شوې ناسته کې د خبرو پر مهال زیاته کړه، د اساسي قانون د تحریف په اړه ځینې ادعاوې مطرح شوي خو دا ټولې ادعاوې له حقیقته لرې دي.
ښاغلی دانش که څه هم د اساسي قانون په اړه د څېړنيزو بنسټونو له لوري د څېړنو تر سره کولو څخه مننه وکړه خو ټینګار یې وکړ، چې ځینې وختونه له اساسي قانونه د سرغړونې پښې لویې ښودل کېږي.
د ولسمشر دوهم مرستیال ومنله، چې د اساسي قانون په عملي کولو کې کله نا کله ستونزې را منځته کېږي او کله هم له قوانینو څخه سرغړونه کېږي، خو زیاته یې کړه، چې له قانونه سرغړونه د دې مانا نلري چې اساسي قانون دې بې اعتباره او بې ارزښته شي. هغه زیاته کړه که په ځینو مواردو کې له اساسي قانون څخه سرغړونه کېږي باید و یې منو، خو د دې ترڅنګ دا هم باید ومنو چې د اساسي قانون په سلګونو نور موارد عملي کېږي. لکه د حقوقي او فرهنګي نظامونو رامنځته کېدل، د دولتي بنسټونو جوړول، د ټاکنو تر سره کول او د نړیوالو اړیکو تنظیمول.
د ولسمشر دوهم مرستیال ټینګار وکړ چې د اساسي قانون په وړاندې د دولت مسوولیت له نورو بنسټونو او افرادو څخه زیات دی، خو نوموړي هیله څرګنده کړه چې ټول باید اساسي قانون ته درناوی وکړي ترڅو له دې لارې د ملي یووالي او سیاسي ثبات د ټینګښت زمینه رامنځته شي.   
###
د هلمند په مارجې او ګرشک ولسوالیو کې ترهګرو ته درنه مرګ ژوبله اوښتې
تېرو څلورویشتو ساعتونو کې د هیواد د امنیتي او دفاعي ځواکونو د عملیاتو په پایله کې د ۱۱ داعشیانو په ګډون ۴۷ ترهګر وژل شوي او ۲۰ نور یې ټيپان شوي دي.
د ملي دفاع وزارت ویاند ډګر جنرال دولت وزیري، د دوشنبې په ورځ د روان کال د مرغومي په ۱۱ مه نېټه د حکومت د اطلاعاتو او رسنیو په مرکز کې د خبریالانو د پوښتنو د ځواب ویلو پر مهال وویل، همدا مهال د هیواد په ۸ ولایتونو کې ۸ تعرضی عملیات دوام لري او همداراز د کوماندو ځواکونو له لوري ۱۴ تهاجمي عملیات تر سره شوي دي. دغه راز د دښمن د پټنځایونو د له منځه وړلو په موخه ۱۸ هوایي بریدونه هم تر سره شوي دي.
ښاغلی وزیري وویل، د هلمند ولایت د مارجې او ګرشک په ولسوالیو کې ۲۱ ترهګر، د ننګرهار ولایت د شینوارو، اچین، ده بالا، خوګیاڼیو او سرخرود په ولسوالیو کې ۱۱ ترهګر، د فراه ولایت په خاک سفید ولسوالۍ کې ۹ ترهګر، د غزني ولایت په مرکز کې ۲ ترهګر، د زابل ولایت په میزانې ولسوالۍ کې یو ترهګر او د ارزګان ولایت په مرکز ترینکوټ کې یو ترهګر د ملي اردو د چاڼیزو عملیاتو او هوایي بریدونو په ترڅ کې وژل شوي دي.
د ملي دفاع وزارت ویاند زیاته کړه، په ننګرهار، غزني، زابل، ارزګان، فاریاب، بدخشان او هلمند ولایتونو کې د امنیتي ځواکونو عملیات په بریالیتوب سره پر مخ روان دي.
###
۱۳۹۶ مالي کال کې د صادراتو او ملي عوایدو کچه لوړه شوې
په ۱۳۹۶ مالي کال کې د افغانستان صادرات ۷۲۳ میلیونه ډالرو ته رسېدلي، په داسې حال کې چې دوه کاله وړاندې دا اندازه ۵۸۰ میلیونه ډالره وه. همدارنګه د ۱۳۹۶ مالي کال د ملي عوایدو کچه ۱۷۰ میلیارده افغانیو ته رسېدلې، چې د دوو مخکنیو کلونو په پرتله ۷۰ میلیارده افغانۍ زیاتوالي ښیي.
اجمل عبدالرحیم زي، د مالیې وزارت د عامه اړیکو رییس او ویاند، چې د دوشنبې په ورځ د روان کال د مرغومي په ۱۱مه نېټه یې د حکومت د اطلاعاتو او رسنیو په مرکز کې د یوه خبري کنفرانس پر مهال د اقتصاد د عالي شورا د ناستې پایلې بیانولې، زیاته کړه: په ۱۳۹۶ مالي کال کې د هیواد اقتصاد ۲.۶ سلنه وده کړې، چې دا شمېره د هیواد د راتلونکې اقتصادي ودې لپاره یو ښه خبر دی.
عبدالرحیم زي همداراز وویل، چې د اقتصاد عالي شورا په نولسمه ناسته کې د مخابراتي محصول د راټولو د قانون د تعدیل په اړه د مخابراتو وزارت د طرحې، د تالک د منرال د زنځېري ارزښت څېړنه او د بغلان ولایت د سنګ کرکر او دودکش د ډبرو سکرو د کانونو او سمنټو فابریکو په اجاره ورکولو د قرارداد د رپوټ په اړه بحث او خبرې وشوې.
د هغه په وینا د اقتصاد عالي شورا په ناسته کې د مخابراتي خدمتونو د محصول د قانون د یولسمې مادې د دوهمې فقرې او لسمې مادې د تعدیل په اړه پیشنهادي طرحه تایید او پرېکړه وشوه چې د قوانینو د کمېټې له لارې د قانوني پړاونو د بشپړولو په موخه دې د کابینې ناستې ته ولېږل شي. 
د اقتصاد عالي شورا په ناسته کې همداراز پرېکړه وشوه، چې د تالک منرال د استخراج او پروسس په موخه دې پانګه اچوونکي وهڅول شي او د هغوی اسنادونه دې تر ارزونې وروسته داوطلبۍ ته وړاندې کړل شي.
ښاغلي عبدالرحیم زي همدا راز وویل، چې د صوتي او تصویري رسنیو د بانکي تضمین او د فعالیت د حق الامتیاز په برخه کې هم ۵۰ سلنه کموالی رامنځته شوی دی.
###
د روان کال په درېیمه ربعه کې د نشه یې توکو او مسکراتو د جرمونو په تور ۱۶۸ کسان نیول شوي دي
د روان کال په درېیمه ربعه کې د نشه یي توکو او مسکراتو پر وړاندې د مبارزې عدلي او قضایي مرکز ته د نشه یې توکو او مسکراتو د جرمونو ۱۳۵ قضیې رسېدلي دي. ددغه مرکز ویاند احمد خالد مؤحد، د دوشنبې په ورځ د روان کال د مرغومي په ۴ مه نېټه د حکومت د اطلاعاتو او رسنیو په مرکز کې د یوه ګډ خبري کنفرانس پر مهال وویل، چې ۱۶۸ کسان په دغو پېښو کې د لاس لرلو په تور نیول شوي دي. د هغه په خبره د نیولو شویو کسانو له ډلې، ۹ تنه یې د عامه خدمتونو مؤظفین، ۱۲ مېرمنې او ۲ تنه ایرانیان دي.
د نشه یې توکو او مسکراتو د جرمونو پر وړاندې د مبارزې عدلي او قضایي مرکز له لوري د نشه یې توکو او مسکراتو د جرمونو اړوند د ۱۴۷ قضیو لومړنۍ څېړنې بشپړې شوي او د نورو څېړنو اوعدلي تعقیب په موخه د نشه یې توکو او مسکراتو د جرمونو پر وړاندې د ځانګړې څارنوالۍ عمومي ریاست ته لېږل شوي دي.
ښاغلی مؤحد وویل، چې د روان کال په درېیمه ربعه کې د نشه یې توکو او مسکراتو د جرمونو پر وړاندې د ځانګړې څارنوالۍ عمومي ریاست، ۱۵۰ قضیې، چې ځینې یې له پخوا دوی ته لېږل شوې وې ابتداییه محکمې، ۸۵ قضیې یې د استیناف محکمې او ۵۳ قضیې یې د سترې محکمې د عامه امنیت دېوان ته لېږلې دي.
د روان کال د دریمې ربعې په اوږدو کې ۱۷۴ تنه د ابتداییه محکمې لخوا او ۸۳ تنه د نشه یې توکو او مسکراتو پر وړاندې د استیناف د محکمې لخوا په جزا محکوم شوي او د تورنو کسانو له ډلې ۹ تنه یې د کره دلایلو د نشتون له امله برائت تر لاسه کړی دی.
د روان کال په درېیمه ربعه کې د نشه یې توکو او مسکراتو د جرمونو ۱۳۵ قضیې، د نشه یي توکو او مسکراتو پر وړاندې د مبارزې عدلي او قضایي مرکز ته رسېدلي دي. د تورنو کسانو پر نیولو سربېره ۳۹۱ کیلو ګرامه هیرویین، ۱۲۶ کیلوګرامه مورفین، تر ۴۵۰۰ کیلوګرامو زیات تریاک، له ۴۰ زرو کیلو ګرامو زیات چرس او په سلګونو کیلو ګرامه الکولي مشروبات، جامد او اوبلن کیمیاوي توکي کشف او تر لاسه شوي دي.
خوست، دایکندي، میدان وردګ، بامیان، سمنګان، ارزګان او لغمان هغه ولایتونه دي، چې په یاده موده کې د نشه یې توکو او مسکراتو د جرمونو پر وړاندې د مبارزې په عدلي او قضایي مرکز کې د نشه یې توکو او مسکراتو د جرمونو اړوند هیڅ ډول قضییه نلري.
د نشه یي توکو او مسکراتو پر وړاندې د مبارزې عدلي او قضایي مرکز د قانون له مخې د نشه یې توکو اړوند هغو قضییو ته د رسېدو عدلي او قضایي صلاحیت لري، چې اندازه یې لږه تر لږه ۲ کیلوګرامه هیرویین، ۱۰ کیلوګرامه تریاک، ۵۰ کیلو ګرامه چرس، ۵۰۰ کیلوګرامه کیمیاوي توکي یا ۵۰ لیتره الکولي مشروبات وي.    
###