image image image image image
جمهوررئیس غني مزارشریف ښار ته ورسېد
د افغانستان د اسلامي جمهوریت جمهوررئیس محمداشرف غني چې د یو لوړ رتبه دولتي پلاوي په مشرۍ بلخ ولایت ته تللی و، نن له غرمې مخکې د بلخ ولایت مرکز مزار شریف ښار ته ورسېد.

په پام کې ده، جمهوررئیس غني به په دغه سفر کې د مزارشریف ښار په یو ښوونځي کې د زنګ په کړنګولو سره په دغه ولایت کې ۱۳۹۶  تعلیمي کال رسماً پيل کړي.

همداراز به د هېواد جمهوررئیس د “نور” تالار او د روضیې مبارکې جومات هم رسماً پرانیزي.

د هېواد جمهوررئیس به په مزارشریف کې د بلخ والي عطامحمد نور له خوا په جوړې شوې میلمستیا کې د ګډون تر څنګ د ۲۰۹قول اردو له مشرتابه پلاوي سره هم لیده کاته ولري.#
جمهوررئیس غني د پولیسو خاصو ځواکونو ته: هر څوک چې د دولت او قانون په ضد وسله پورته کوي، وې ځپئ
د افغانستان د اسلامي جمهوریت جمهوررئیس محمداشرف غني نن سهار د ” ملي پولیسو د خاصو قطعاتو عمومي قوماندانۍ” مقر ته ورغی او د دغې قوماندانۍ له لوړ رتبه منسوبینو، افسرانو او سرتېرو سره یې وکتل.

د هېواد جمهوررئیس لومړی د یادې قوماندانۍ تجهیزات او امکانات وکتل او ورپسې یې په هغه ناسته کې ګډون وکړ چې د کورنیو چارو وزارت او د ملي پولیسو د خاصو قطعاتو قوماندانۍ مشرتابه پلاوي په کې حضور درلود.

په دغه ناسته کې د ملي پولیسو د خاصو قطعاتو قوماندان سیدمحمد روشندل جمهوررئیس ته د خاصو قطعاتو د وضعیت، فعالیتونو او ننګونو په اړه راپور ورکړ. هغه وویل دغه قطعات د هېواد په ۳۴ ولایتونو کې فعال حضور لري چې دا مهال په لسو ولایتونو کې په عملیاتو او او د دښمن په ځپلو بوخت دي.

روشندل زیاته کړه، د درې نویو قطعو جوړول پیل شوي دي، چې د ۱۳۹۸کال تر وروستیو به بشپړ شي چې دغه قطعات به په هرات، کندز او ننګرهار ولایتونو کې میشت شي.

هغه ولایتونو ته د سرتېرو، ټپیانو او شهیدانو د انتقال لپاره د یو بودجوي واحد جوړولو، د ظرفیت لوړولو، د وسلو د ترمیم او هغو تجهزاتو ته لاسرسی چې ماینونه خنثا کوي، د مرکز او ولایتونو په کچه د تاسیساتو جوړولو، د دغې قطعې د ټپیانو د درملنې په خاطر له یو روغتون سره قراراداد، د معاشاتو زیاتولو، د تاکتیکي تمریناتو لپاره د ساحو رامنځته کولو، د افسرانو لپاره د کورسونو جوړولو او د شهیدانو کورنیو ته د پاملرنې په هکله جمهوررئیس ته ځانګړي وړاندیزونه مطرح کړل.

جمهوررئیس غني د خاصو ځواکونو له زړورتیا او اتلولۍ مننه وکړه، وې ویل چې له تروریستانو سره په مبارزه کې هیڅ ابهام نشته او هر څوک چې د دولت او قانون په ضد وسله پورته کړي، زموږ د امنیتي او دفاعي ځواکونو له خوا به وځپل شي.

جمهوررئیس زیاته کړه، د پولیسو له خاصو قطعاتو څخه د استفادې طرزالعمل دي رعایت شي او د مکافاتو تر څنګ دې مجازات هم په پام کې ونیول شي. هغه وویل، تر راتلونکو پنځو ورځو پورې به د دغو قطعاتو عادي وسلې تامین شي.

هغه د کورنیو چارو وزارت تامیناتي معین ته لارښوونه وکړه چې د شهیدانو کورنیو ته د مرستې په موخه بیړنۍ ارزونه وکړي او ټینګار یې وکړ هر هغه مقرره دې اصلاح شي چې د مرستو رسولو بهیر اوږدوي.

جمهوررئیس محمداشرف غني ټپیانو ته پر رسیدګۍ ټینګار وکړ وې ویل، د ټپیانو د درملنې په خاطر ارزونې پيلوو، تر څو په وخت سره په یو بین‌المللي روغتون کې د ټپیانو درملنه وشي.

د هېواد جمهوررئیس څرګنده کړه، د خاصو قطعاتو لپاره دې د افسرۍ کورسونو ځانګړې منظمه بودجه په پام کې ونیول شي او د هوايي ځواک په هکله یې د کورنیو چارو وزارت ته لارښوونه وکړه چې یو منظم جدول ترتیب کړي، تر څو په دغه برخه کې د پولیسو د خاصو قطعاتو اړتیاوې پوره شي.

جمهوررئیس د پولیسو د خاصو قطعاتو د سرتېرو د تلفاتو په کمښت ټینګار وکړ وې ویل، د دغو قطعاتو جګړه‌ییز تجهیزات باید زیات شي. هغه د دغو قطعاتو د تاسیساتو په اړه وویل، له بین‌المللي همکارانو سره د دایمي تاسیساتو د جوړولو په سر بحث روان دی.

جمهوررئیس د خاصو قطعاتو د معاشونو د زیاتوالي په اړه د کورنیو چارو وزارت ته لارښوونه وکړه چې په دغه برخه کې هر اړخیزې ارزونې پيل کړي. هغه وویل، د افسرانو ذاتي قانون تعدیلېږي، تر څو هغه ساتمنان او بریدملان چې ښه جګړیزې تجربې لري ترفیع وکړي او له هغوی څخه دې د قطعاتو په مدیریتي برخو کې کار واخیستل شي.

جمهوررئیس غني څرګنده کړه، خصوصي سکتور د ورکشاپ جوړولو په برخه کې همکارۍ ته چمتو دی چې په اوږد مهال کې به دغه ورکشاپونه په پښو ودرېږي. هغه وویل، د عملیاتو د چټکتیا په موخه څارنوالۍ د پولیسو له خاصو قطعاتو سره همکاري کوي.

ورپسې جمهوررئیس هغو مراسمو ته ورغی چې د پولیسو د خاصو قطعاتو سلګونو سرتیرو او افسرانو په کې حضور درلود.

په دغه مراسمو کې د کورنیو چارو وزیر تاج محمد جاهد په خپله وینا کې له امنیتي او دفاعي ځواکونو څخه د جمهوررئیس د همیشنۍ پاملرنې او ملاتړ څخه مننه وکړه. هغه جمهوررئیس ته ډاډ ورکړ چې امنیتي ځواکونه په هر ډول شرایطو کې له وطن او خلکو څخه د دفاع  په لار کې خدمت ته چمتو دي.

جمهوررئیس غني د پولیسو د خاصو قطعاتو له سرتېرو څخه  د دښمن په ځپلو کې د اتلولیو له ښوولو څخه مننه وکړه او هغوی ته یې وویل: ستاسو اتلولي د دې لامل شوې ده چې “خاص” واوسئ او دا ستاسو اتلولي ده چې د دښمن په زړه کې مو ویره پيدا کړې ده او هیڅکله خپلو شومو موخو ته نشي رسیدلی.

په پای کې د هېواد جمهوررئیس په داسې حال کې چې د کورنیو چارو وزارت د مشرتابه پلاوي هم حضور درلود د دغې قوماندانۍ په مقر کې د خاصو قطعاتو د شهیدانو د یادڅلی د پټۍ په پرې کولو سره پرانیست او د امنیتي او دفاعي ځواکونو د ټولو شهیدانو روح ته یې د خدای (ج) په دربار کې دعا وکړه.
جمهور رئیس غني د بغلان ولایت مشرانو او استازو سره وکتل
د افغانستان د اسلامي جمهوریت جمهور رئیس محمد اشرف غني نن مازدیګر د بغلان ولایت له یو شمېر مشرانو او استازو سره په کتنه کې د شهید وکیل علم جان مجاهد د شهادت له امله یو ځل بیا د بغلان مشرانو ته تسلیت ووایه او ارواښاد ته یې د فردوس جنت دعا وکړه.

په دغه کتنه کې چې په ارګ کې ترسره شوه، د بغلان د ولایتي شورا رئیس اسدالله شهباز، خانزاده مظلوم یار مجاهد، سیدکمال وردګ او مولوي عبدالولي راجي د نورو په استازیتوب خبرې وکړې او د بې ځایه شویو کورنیو، د ځمکو د غصب، دکیله ګي بند، انکشافي او بیارغاونې چارو، د بغلان محلي اداره کې د اداري فساد او ناامنۍ ستونزې یې له جمهور رئیس سره شریکې کړې.

دغو ویناوالو د  بغلان د ولسونو د ستونزو حل ته د جمهور رئیس له پاملرنې او هلو ځلو څخه د مننې پرمهال د یادو ستونزو د حل او د شهید حاجي علم جان مجاهد د قاتلینو د نیولو او قانوني مجازات په اړه هم خپلې غوښتنې او وړاندیزونه مطرح کړل.

د دوی د معلوماتو او وړاندیزونو له اورېدلو وروسته جمهور رئیس غني د بغلان د ولسونو  صبر او استقامت وستایه او د جمهوري ریاست د چارو ادارې ته یې له بې ځایه شویو کورنیو سره د لازمو مرستو لارښوونه وکړه.

جمهور رئیس وویل، سږکال مو په کابل کې د غصب شویو ځمکو د راګرځولو په خاطر ۴۰۰ کسیز خاص کنډک جوړ کړ او زرګونه غصب شوې ځمکې او جایدادونه مو بېرته راوګرځول. هغه په ټینګار وویل، راتلونکی کال به د غصب شویو ځمکو ترلاسه کولو او د غصب د مخنیوي برخه کې جدي اقدامات وشي.

د هېواد جمهور رئیس وویل، د بغلان د برېښنا ستونزه به په اساسي توګه حل شي او همدارنګه به د بغلان په محلي ملکي او نظامي ادارو کې د اصلاحاتو بهیر د پلي کولو په موخه د جمهوري ریاست د سلاکار عبدالستار سعادت په مشرۍ یاد ولایت ته پلاوی واستول شي.

محمد اشرف غني وویل، د بغلان ستونزې ولسي حل غواړي، ځکه د بغلان د اکثره ستونزو لامل هغه بې عدالتۍ دي چې د یاد ولایت ولسونه ورڅخه ځورېږي. هغه د بغلان ولایت ته ټاکل شوي پلاوي ته لارښوونه وکړه چې د خپلو څېړنو او ارزونو تر څنګ د بغلان له مشرانو او استازو سره په ګډه یوه جامع ولسي طرحه ترتیب او جمهوري ریاست ته وړاندې کړي.

په پای کې د بغلان ولایت مشرانو او استازو د هېواد جمهور رئیس ته د عزت پګړۍ ور په سر او د خدای تعالی په دربار کې یې هغه ته په چارو کې د لا بریالیتوبونو هیله وکړه.
جمهور رئیس غني: قضائیه قوه د هېواد د سیاسي، اجتماعي او اقتصادي ثبات لپاره نهایت لازمي عنصر دی
د افغانستان د اسلامي جمهوریت جمهور رئیس محمد اشرف غني نن مازدیګر ”قضا د قانون حاکمیت او د عدالت د تامین ښکارندوی“ تر سرلیک لاندې د سترې محکمې د عالي قضایي سیمینار اختتامیه مراسمو کې ګډون او وینا وکړه.

په دې مراسمو کې چې پر جمهور رئیس سربېره د جمهوري ریاست دویم مرستیال قانونپوه محمد سرور دانش، قاضي القضات او د سترې محکمې رئیس سیدیوسف حلیم، لوی څارنوال فرید حمیدي، د افغانستان د علماو د سراسري شورا رئیس مولوي قیام الدین کشاف او د کابینې او ملي شورا یو شمېر غړو، د سترې محکمې د قضايي عالي شورا غړو او د هېواد د استیناف محکمو رئیسانو حضور درلود، جمهور رئیس غني وویل، د هېواد د اساسي قانون یو امتیاز دادی چې درې ګونې قواوې یې په واضح توګه تفکیک کړې دي او قضائیه قوه په هغه کې د نظام د مستقل رکن په توګه لوړ مقام لري.

جمهور رئیس زیاته کړه، قضاییه قوه د هیواد د سیاسي، اجتماعي او اقتصادي ثبات لپاره نهایت لازمي عنصر بللای شو. که قضا او قانون نه وي، وګړي او موسسې له یو بل سره د حقوقي دعوو او مشکلاتو د حل لپاره مناسبه طریقه نه مومي او اجتماعي بې ثباتي راځي.

محمد اشرف غني وویل، د افغانستان د تاریخ دقیقه مطالعه مو دې نتیجې ته رسوي چې په هر هغه وخت کې سیاسي ثبات و چې خلکو په قضایي او عدلي ادارو باندې باور درلود، یعنې د سیاسي ثبات لپاره که یوازې په قهریه قوه اکتفا شوې ده، نتیجه یې نه ده ورکړې.

جمهور رئیس غني وویل، د سیاسي ثبات لپاره تل لازمه ده چې عادلانه محاکم ولرو. کله چې قضا کمزورې وي، خلک د خپلو منازعاتو د حل لپاره د قانون په ځای سمت، قوم، ډلې یا داسې بل څه ته مراجعه کوي چې په نتیجه کې یې تقابل ایجادېږي، ثبات له منځه ځي او بې عدالتي په فرهنګ بدلېږي.

د هېواد جمهور رئیس وویل، د سولې یو تړون د سولې چوکاټ جوړوي خو سوله بیا هغه وخت دوام پیدا کوي چې عدلي، قضایي نظام پیاوړی وي او عدالت رعایت شي.

هغه څرګنده کړه، زموږ په فرهنګ کې قاضي ځانګړی  وقار درلود چې هغه د عدالت او حق طبلۍ رمز او د دې لامل کېده چې هغه په ممتاز اخلاقو، پاک وجدانۍ او پاک لمنۍ د خلکو په منځ کې مشهور وي او د قضا دستګاه کې یې اعتماد خوندي کړي. د هغه فرهنګ او اخلاقي اعتبار احیا او همدارنګه زموږ د هېواد قاضیانو لپاره د هغه مقام او منزلت اعاده یوه له هغو اړتیاو څخه ده چې باید جدي پاملرنه ورته وشي.

جمهور رئیس وویل، هغه واکمنان چې د عادل نوم یې ګټلای، زموږ په جمعي حافظو کې د خیر او نیکي په اعلی مثالونو باندې بدل شوي دي، خو له دغسې فرهنګي زمینې سره سره، موږ د قانون د حاکمیت په برخه کې مشکلات لرلي دي.

جمهور رئیس غني پر دې په ټینګار چې هیڅوک د قضا او څارنوالۍ په چارو کې د مداخلې حق نه لري وویل، د قدرت خاوندانو ډېر ځله خپلو غوښتنو او خواهشاتو ته تر قانون ترجیح ورکړې ده. نن هم خلک د قانون د حاکمیت له کمزورۍ شکایت کوي او شکایت یې په ځای دی.

جمهور رئیس د عدلي او قضایي دستګاو د اصلاح په برخه کې د قاضي القضات او لوی څارنوال د کړنو د قدردانۍ په ترڅ کې وویل، زه په ټول توان د دې بهیر ملاتړ کوم او دا اطمینان ورکوم چې د دولت رهبري لکه څنګه چې په خپله د دې دستګاو کار کې دخالت نه کوي، هیڅ فرد یا بل لوري ته د هغوی په کار کې د مداخلې اجازه نه ورکوي.

جمهور رئیس غني زیاته کړه، زموږ قضائیه قوه کاملاً یوه مستقله قوه ده او دا استقلال به تل خوندي وي او بلکې پیاوړی به هم شي. اما د یوې دستګاه استقلال د ځواب نه ویلو په مانا نه دی، بلکې د هغه ارزښت په بنا چې عدالت او د قانون اجرا یې لري، زموږ قضایي دستګاه هم باید خلکو او هم نورو اړوندو ادارو ته د ګټورو میکانیزومونو په تکیه ځواب ویونکې وي او خپل کارونه د همکارۍ او شفافیت په روحیه ترسره کړي،

محمد اشرف غني څرګنده کړه، زموږ قاضيان، څارنوالان او د عدلي، قضایي نظام نور منسوبان د هیواد او ټولنې د ساتنې په کار کې هغه نقش لري لکه عسکر او پولیس چې یې لري. پاکو او زړه ورو قاضیانو د تروریستانو په شمول د هیڅ زورواکي او قانون ماتونکي پروا نه ده ساتلې او د عدالت حماسه یې رامنځ ته کړې ده.

جمهور رئیس وویل، د قضائیه قوې موثریت په دې پورې تړاو لري چې نور مسول او اړوند ارګانونه هم خپلې دندې په ښه توګه ترسره کړي. هغه زیاته کړه، دا د منلو وړ نه ده چې د محاکمو پرېکړې صادرې شي اما نورې ادارې لکه حقوق او د دولت  قضایا یا پولیس یې وځنډوي.

جمهور رئیس د نظام عدلي او قضایي منسوبینو ته په خطاب کې وویل، زموږ امنیتي او دفاعي قوتونه د خپلو کارونو د تکمیل لپاره تاسې ته ضرورت لري، ځکه په ټولنه کې نهایي نظم او ثبات د عدالت په زور راځي او د عدالت اصلي مجریان تاسې یاست.

جمهور رئیس غني د خپلو خبرو په پای کې وویل، زما له نظره هغه کسان چې د قانوني پرېکړو اجرا کې کارشکني کوي په هر مقام کې چې وي هغه خاینان ګڼل کېږي چې د وطن تخریب او خلکو ته زیان اړولو او د نظام بې اعتمادۍ کې د هغوی رول د تروریستانو ډلو رول سره د پرتلنې وړ دی او همغسې باید د قانون مطابق مجازات شي.

په دې مراسمو کې د سترې محکمې د قضایي تعلیماتو رئیس ډاکټر عبدالله عطایي د سترې محکمې د عالي قضایي سیمینار په اړه معلومات ورکړل وې ویل، قاضیانو او فقهاو په څلور ورځني سیمینار کې د تېرو څلورو میاشتو په اوږدو کې جزایي او د اداري فساد ۷۸ موضوعاتو، نشه یي توکو سره د مبارزې اړوند ۳۴ موضوعاتو، د وثیقو اړوند ۳۵ موضوعاتو، د شخصیه احوال او اثبات وسایلو اړوند ۱۳۶ موضوعاتو،  د سوداګرۍ د برخو اړوند ۳۷موضوعاتو او د مقرراتو، لایحو او طرزالعملونو او لارښودونو اړوند ۸۲ موضوعاتو ته رسیدګي وکړه.

په دې مراسمو کې قاضي القضات او د سترې محکمې رئیس سیدیوسف حلیم هم خبرې وکړې او په تېر یو کال کې یې د سترې محکمې د لاسته راوړنو په اړه معلومات ورکړل وې ویل، سترې محکمې د اساسي قانون په مرسته او د ټولو قوانینو په رعایت د قضا چارو کې مداخلې سره مقاومت وکړ، د قانون تطبیق ته یې پاملرنه وکړه، عادي او اقتضایي تفتیش یې په دوامداره توګه ترسره کړ او ترسره کوي یې، د علني قضایي محکمو د جوړولو په خاطر یې مناسب بسترونه رامنځته کړل او د محکمو د ظرفیت لوړولو په برخه کې یې ګامونه واخیستل.

همدارنګه په افغانستان کې د امریکا د سفیر مرستیال دینیس هیرني هم په دې مراسمو کې خبرې وکړې او د امریکا متحده ایالاتونو د پرمختیایي ادارې د تخنیکي همکارۍ د یادونې ترڅنګ یې د یاد سیمینار په جوړولو کې وویل، هیله من یم د یاد سیمینار جوړول د افغانستان د قاضیانو د ظرفیت لوړولو کې موثر واقع شي.

هغه د قضایي اصلاحاتو په برخه کې د امریکا د زیاتو همکاریو ډاډ ورکړ، زیاته یې کړه، د افغانستان خلک موثر، بې طرفه او شفافو عدلي او قضایي بنسټونو ته لاسرسی غواړي او په دې برخه کې د سترې محکمې کوښښونه د ستاینې وړ دي.
د افغانستان د علماو سراسري شورا: پر سردار محمد داوود خان روغتون برید په هیڅ دین او قانون کې توجیه کېدونکی نه دی
د هېواد د علماو د سراسري شورا غړو د افغانستان د اسلامي جمهوریت جمهور رئیس محمد اشرف غني سره په کتنه کې په هېواد کې وروستي تروریستي بریدونه په ځانګړي ډول پر سردار محمد داوود خان روغتون برید د اسلامي او انساني موازینو خلاف وباله او هغه یې سخت وغانده.

په دې کتنه کې چې نن مازدیګر په ارګ کې ترسره شوه، په داسې حال کې چې د افغانستان د علماو د سراسري شورا رئیس مولوي قیام الدین کشاف هم حضور درلود، د یادې شورا اعلامیه شیخ عبدالحسین حیدري ولوسته.

همدارنګه په دې اعلامیه کې د افغانانو د تګ راتګ لارو د تړلو په برخه کې د پاکستان د حکومت کړنه، د پاکستان مختلفو سیمو کې د افغان کډوالو ځورول او د ډیورنډ له هغې غاړې څخه پر افغانستان د زرګونو راکټونو ورول په سختو ټکو وغندل او دا یې د اسلامي، انساني او ګاونډیتوب د حقونو او بین المللي قوانینو خلاف وبلل، غوښتنه یې وکړه چې ژر تر ژره دې له خپلو دغو ظالمانه اعمالو لاس واخلي.

د افغانستان د علماو سراسري شورا د سوریې جنګ ته د افغان ځوانانو د لېږلو په اړه اندېښنه وښوده  او له ایراني مقاماتو څخه یې وغوښتل چې دې پروسې ته خاتمه ورکړي او د دې په بدل کې د اسلامي همدردي او ورورولي په اساس د افغان کډوالو د ستونزو په حل کې مرسته او همکاري وکړي.

شورا همدارنګه د نشه یي توکو او ټولو مسکراتو تولید، قاچاق، سوداګري او استعمال حرام وباله او له اړوندو ارګانونو یې وغوښتل چې د هغو په مخنیوي کې له پخوا زیات کوښښ وکړي.

په همدې ترتیب د علماو سراسري شورا په دې اعلامیه کې له دولت څخه وغوښتل چې تعلیمي او تحصیلي موسسو ته د ماشومانو او ځوانانو په جلب او جذب کې خصوصاً د دیني علومو په برخه کې ځانګړې پاملرنه وکړي تر څو بهرنیو هېوادونو ته د هغوی د تګ  چې د هېواد پر ضد د هغوی د استخدام لامل کېږي،  مخنیوی وشي.

جمهور رئیس غني د افغانستان د علماو سراسري شورا د اعلامیې له اورېدلو وروسته د دې په ترڅ کې چې له علماو سره په ناسته یې خوښي وښوده وویل، د افغانستان د خلکو دښمنان زموږ له ماشومانو او هېوادوالو د زده کړې  او ژوند فرصتونه اخلي. هغوی نه یوازې د دې نسل بلکې د راتلونکو نسلونو دښمنان دي، ځکه غواړي چې موږ په حقارت کې ژوند وکړو.

جمهور رئیس له علمای کرامو وغوښتل چې د جوماتونو او تکایاو له لارې د تحمیلي جنګ لاملونه، اغېزې او عاملین خلکو ته ور وپېژني او په دې برخه کې عامه پوهاوی وکړي.

محمد اشرف غني زیاته کړه: هغوی چې انساني ارزښتونه پایمالوي او زموږ د خلکو پر ضد په جنایت لاس پورې کوي، په هر مقام او منصب کې چې وي باید رسوا شي او قانوني چلند ورسره وشي.

جمهور رئیس له علمای کرامو څخه د هېواد امنیتي او دفاعي ځواکونو لیکو سره د یو ځای کېدو لپاره د ځوانانو د هڅونې مننه وکړه وې ویل، طالبان او ټولې تروریستي ډلې د انتحار او انفجار په ترسره کولو سره بشري ضد جنایتونه کوي.

هغه د سوداګریزو مالونو د ترانزیت په خاطر بدیلو لارو موندلو ته په اشارې وویل، د ازبکستان نوي حکومت سره زموږ مذاکرات ګټور دي او د اقینې او چابهار ترڅنګ د نورو بدیلو لارو د موندلو په هڅه کې هم یوو.

محمداشرف غني وویل، له ایران سره د افغان کډوالو له مجبوریتونو څخه د ناوړه ګټه اخیستنې موضوع په واضح توګه مطرح شوې ده. هغه د نشه یي توکو د قاچاق مخنیوي په اړه وویل، د قاچاق مخنیوی یوازې د افغانستان مسوولیت نه دی، بلکې هغه هېوادونه چې د هغو په تولید، استعمال او د کیمیاوي موادو انتقال کې رول لري، باید په دې برخه کې اقدام وکړي.

جمهور رئیس د خپلو خبرو په پای کې وویل، د اسلام مبین دین خاص عظمت لري او هیڅ ترویستی ډلې ته بایدد دې اجازه ورنه کړل شي چې خپل جنایتونه د اسلام د مبین دین د لارښوونو په ناسم تعبیر سره توجیه کړي.


چاپي خپرونې

  • خبرپاڼه
  • مجله
  • ګډون وکړﺉ
faceBook icon twitter icon flicker icon youtube icon