image image image image image
انجينير محمد خان: د اداراتو په داخل کې د مسئولينو له خوا سليقوي چلند خيانت او فساد دی
د هېواد يو شمېر ولايتونو د پوهنې رئيسانو د اجرائيه رياست لومړي مرستيال انجينير محمد خان سره د هغه د کار په دفتر کې وکتل.
په دغه ليدنه کې د خوست، کندهار، ميدان وردک، کاپيسا، پروان، پنجشير، کابل او کنړ د پوهنې رئيسانو د پوهنې په برخه کې د خپلو ولايتونو ستونزو سربېره د پوهنې وزارت په داخل کې يو شمېر مشکلاتو ته په اشاره وويل چې وزارت د يو شمېر مسئولينو له خوا له دوی سره د CBR پروسې په بهانه سليقوي چلند ترسره کېږي چې دوی ته يې ډېرې ستونزې پېښې کړې دي.
د يادو ولايتونو رئيسانو د اجرائیه رياست له لومړي مرستيال څخه غوښتنه وکړه چې د دوی د مشکل په هوارولو کې له دوی سره مرستې وکړي.
د اجرائيه رياست لومړي مرستيال انجينير محمد خان د يادو ولايتونو د پوهنې رئيسانو ته د ښه راغلاست ترڅنګ د دوی ستونزې پر ځای وبللې او ويې ويل: هيڅوک حق نه لري چې د اداروو په داخل کې د روڼتيا په خاطر پورته شوي ګامونه د شخصي موخو لپاره وکاروي.
لومړي مرستيال د اراتو په داخل کې د مسئولينو له خوا سليقوي چلند خيانت او فساد وباله او زياته يې کړه چې د پوهنې وزارت په شمول د دولت په نورو برخو کې د کارمندانو د ګمارنې نوې پروسې د ظرفيتونو د لوړاوي په خاطر پر مخ وړل کېږي، نه دا چې يو شمېر وګړي يې د خپلو نامشروعو موخو لپاره وکاروي.
ښاغلي محمد خان د پوهنې وزارت راغلو رئيسانو ته ډاډ ورکړ چې د دوی د ستونزو د هوارولو په موخه به اړوندو مسئولينو ته لازمې لارښوونې وکړي
جمهور رئیس غني د مرحوم پیرسیداحمدګیلاني د جنازې، تدفین او فاتحې مراسمو د ترسره کولو لپاره کمیسیون موظف کړ
د افغانستان د اسلامي جمهوریت جمهور رئیس محمداشرف غني او د هېواد ملي، سیاسي او جهادي شخصیتونو او د کابینې غړو نن سهار په ارګ کې د سولې عالي شورا د رئیس مرحوم پیرسیداحمدګیلاني د کورنۍ غړو ته د تسلیت او ډاډګېرنې مراتبو د څرګندولو تر څنګ د مرحوم پیرصاحب د جنازې، تدفین او فاتحې مراسمو په اړه مشورتي ناسته وکړه.

په دغه ناسته کې چې د جمهور رئیس دویم مرستیال محمد سرور دانش او اجرائیه رئیس ډاکټر عبدالله عبدالله هم حضور درلود، جمهور رئیس غني د سولې عالي شورا رئیس پیرسیداحمدګیلاني د هېواد عرفاني، جهادي او ټولو افغانانو ته د قدر او  درناوي وړ شخصیت وباله او د نوموړي د وفات له امله یې د مرحوم د کورنۍ غړو، د افغانستان ولس او ټولو سیاسیي او جهادي شخصیتونو ته تسلیت ووایه.

جمهور رئیس غني د سولې عالي شورا د مرستیال استاد محمدکریم خلیلي په مشرۍ یو کمیسیون ته چې د سولې عالي شورا مرستیال مولوي خبیر، د سولې عالي شورا غړی حاجي دین محمد، د ښار جوړولو وزیر سیدسعادت منصور نادري، د جمهوري ریاست سلاکار نجیب الله مجددي، په سیاسي چارو کې د جمهور رئیس ځانګړی استازی ډاکټر محمد اکرم خپلواک، د جمهور رئیس سلاکار فاروق وردګ، د ننګرهار والي محمدګلاب منګل، د جمهوري ریاست سلاکار اسدالله وفا، د حج او اوقافو وزارت معین عبدالحکیم منیب، د ملي دفاع وزارت لوی درستیز سترجنرال قدم شاه شهیم، د کورنیو چارو وزارت ارشد امنیتي معین ستر پاسوال عبدالرحمن رحمان، د لغمان والي عبدالجبار نعیمي، د سیمه ییزو ارګانونو خپلواکې ادارې سرپرست عبدالباقي پوپل، د چارو ادارې مرستیال فریدون الهام او د ملي امنیت عمومي ریاست معاون عبدالمتین بیک یې غړيتوب لري، دنده وسپارله چې د مرحوم پیرسیداحمدګیلاني د جنازې، تدفین او فاتحې مراسمو د ترسره کولو لپاره بشپړ تیاری ونیسي.

محمد اشرف غني او د دغې مشورتي ناستې ټولو ګډونوالو د افغانستان د جهاد او د سولې د مذاکراتو په برخه کې د سولې عالي شورا د رئیس پیرسیداحمدګیلاني خدمتونه د قدر وړ او د هغه رول اساسي او کلیدي وباله.

د دغې مشورتي ناستې ګډونوالو په پای کې یو ځل بیا د مرحوم پیرصاحب کورنۍ او د افغانستان مجاهد ولس ته د تسلیت او ارواښاد ته د خدای تعالی په دربار کې د دفردوس جنت دعا وکړه.
جمهور رئیس غني د شهید حفیظ الله پاڅون بارکزي کورنۍ ته د شجاعت دولتي نښان ورکړ
د افغانستان د اسلامي جمهوریت جمهور رئیس محمد اشرف غني د شهید حفیظ الله پاڅون بارکزي کورنۍ ته د نوموړي د زړورتیا، سرښندنې او مېړانې د تقدیرولو او د هغه کورنۍ سره د غمشریکۍ او خواخوږۍ څرګندولو په موخه د شجاعت دولتي نښان ورکړ.

ښاغلی حفیظ الله پاڅون بارکزی په کابل کې په ولسي جرګه کې د هلمند د خلکو استازي معلم میرولي په کور د ترهګریز برید پرمهال چې د دوی ژغورنې ته ورغلی وو، شهید شو.

په ارګ کې په دې مناسبت جوړه شوې غونډه کې د ارزګان، هلمند او کندهار ولایت مشرانو هم حضور درلود، په پیل کې په ولسي جرګه کې د ارزګان د خلکو استازي او د شهید پاڅون پلار عبیدالله بارکزي د نوموړي ژوندلیک ولوسته.

ښاغلي بارکزي وویل، شهید پاڅون په دوه کاله او اته میاشتو کې قران کریم له تجوید سره حفظ کړ. د دیني زده کړو ترڅنګ رحمان بابا لېسې څخه په لومړۍ درجه فارغ شو.  په هند کې د سیاسي علومو او ژورنالیزم له لوستلو وروسته یې په نړیوالو اړیکو کې ماسټري وکړه.

ښاغلي بارکزي له جمهور رئیس غني څخه د شهید پاڅون د شهادت د تسلیت او ډاډګېرنې له امله مننه وکړه او زیاته یې کړه، نوموړي د ودان او سوکاله افغانستان لپاره ډېرې هیلې او ارمانونه لرل او تل یې ځوانان او خپل همزولي زده کړې او سوله ییز ژوند ته هڅول.

ورپسې ښاغلي ډاکټر حکمت الله حکمت د لوی کندهار او ارزګان په استازیتوب د خبرو پرمهال د شهید حفیظ الله پاڅون بارکزي د شخصیت، پوهې، وړتیا او زړورتیا په اړه خبرې وکړې. هغه زیاته کړه، د پاڅون لاره او زړورتیا به چې د نورو د ژغورلو لپاره یې خپل ځان نذرانه کړ، د ټولو لپاره ښه بېلګه او ویاړ وي.

وروسته جمهور رئیس غني یو ځل بیا د شهید پاڅون کورنۍ، د ارزګان او لوی کندهار مشرانو ته تسلیت ووایه او د شهید پاڅون د غم د زغم په برخه کې یې د دوی صبر او استقامت وستایه.

جمهور رئیس غني وویل، د تحمیلي جګړې له امله هره ورځ د شهید پاڅون په څېر د هېواد ځوانان قرباني او زموږ ګڼې کورنۍ غمجنې کېږي. هغه زیاته کړه، زموږ ټولو غم، ژوند، ویاړونه، ارزښتونه او راتلونکی سره شریک دی.

د هېواد جمهور رئیس وویل، د شهید پاڅون په ګډون د ټولو شهیدانو پیغام د سولې پیغام دی او د دوی د ارمانونو د پاللو په موخه زموږ امنیتي او دفاعي ځواکونه په هېواد کې د سولې او ثبات د تامین لپاره بې درېغه قربانۍ ورکوي.

جمهور رئیس وویل، له خپلو شخصي پیسو څخه به په ارزګان ولایت کې د شهید حفیظ الله پاڅون بارکزي په نوم دهېواد د بچیانو د زده کړې او روزنې په موخه یوه لېسه جوړه کړي. هغه زیاته کړه، د ارزګان ولایت د امنیت، پرمختګ او معارف د ودې په اړه خپلې طرحې او وړاندیزونه راسره شریک کړئ.

محمد اشرف غني یو ځل بیا د هغوی له زغم او حوصلې څخه په مننې وویل، تاسو ټولنې ته د عزت، لوړې شملې، همت، خواخوږۍ او وطن پالنې عملي مثال شوئ. هغه د تحمیلي جنګ او د بې ګناه خلکو د وینې د ودرولو په برخه کې د ولسي مشرانو همکاري مهمه وبلله.

جمهور رئیس غني وویل، په وحدت، یووالي او ټینګه اراده به افغانستان ودانو، ځکه په دې وطن کې ډېره لویه پانګه او استعدادونه موجود دي چې د هغوی له وړتیاو څخه باید په بېلابېلو برخو کې ګټه واخیستل شي او د خدمت فرصتونه ورته برابر شي.
د جهادي رهبر او د سولې عالي شورا د رئیس فضیلتماب پیرسیداحمدګیلاني د وفات په مناسبت د جلالتماب جمهور رئیس محمد اشرف غني د خواشینۍ پیغام
بسم الله الرحمن الرحیم

نحمده و نصلی علی رسوله الکریم

په خواشینۍ سره خبر شوم چې د ملي اسلامي محاذ د ګوند مشر، جهادي رهبر او د سولې د عالي شورا مشر ښاغلی پیر سید احمد ګیلاني د ورپېښې ناروغۍ له امله وفات شو.

انالله واناالیه راجعون

جناب پیرصاحب په ۱۳۱۱ ل کال د ننګرهار ولایت سره رود ولسوالۍ کي د طریقت د لوی مرشد  مرحوم نقیب صاحب په کور کې وزېږېد. لومړنۍ زده کړې یې په امام ابوحنیفه مدرسه کې وکړې او د شرعیاتو پوهنځی یې کابل پوهنتون کې ولوست.

پیرسید احمد ګیلاني د ولسواکۍ په لسیزه کې د ۱۳۴۳ل کال د اساسي قانون په لویه جرګه کې  د یو اغېزمن او مطرح شخص په توګه فعال ګډون وکړ.

ښاغلي پیرسیداحمدګیلاني پر افغانستان د پخواني شوروي اتحاد د وسله وال یرغل پرمهال د افغانستان د دفاع او د جهاد فریضې د ادا کولو په موخه د افغانستان د مجاهد ولس مشري او رهبري په غاړه واخیسته او په پوره درایت یې دغه رهبري وکړه. وروسته د خپل ځانګړي محبوبیت او درایت له مخې د جهادي تنظیمونو د قیادي شورا رئیس او د عبوري حکومت د قاضي القضات په توګه وټاکل شو.

جناب پیر صاحب له افغانستان څخه د شوروي پوځونو له وتلو وروسته د ارام او مهربان شخصیت او د افغانستان د جهادي رهبر په توګه جهادي تنظیمونه، مشران او د افغانستان خلک سوله ییز ژوند، یووالي، اتحاد او د هېواد په ودانولو کې فعال ګډون ته وهڅول.

پیرصاحب د خپلو ارزښتناکو کوښښونو په ترڅ کي په ۱۳۷۷ کال کې د سیاسي ټولنو، جهادي او علمي شخصیتونو په همغږۍ د سولي یووالي ټولنه جوړه کړه او په بُن  کنفرانس کې یې د هیواد د سوکالۍ او افغان ولس  د هوساینې په موخه ولسواک نظام را منځته کړ.

نوموړي  د افغانستان د اوسني اساسي قانون په جوړښت کې هم د افغانستان د جهادي رهبر، روحاني او ملي مشر په توګه پام وړ رول درلود. تېرکال نوموړی د سولې د عالي شورا د مشر په توګه وټاکل شو او د ده په مشرۍ د افغانستان د اسلامي جمهوري دولت او د حزب اسلامي تر منځ د سولې بین الافغاني مذاکرات په بریالیتوب ترسره شول. د نوموړي مړینه د افغانستان لپاره یوه ضایعه ده.

افغانستان په اوسني پړاو کې د سولې او ثبات د تامین او نورو ملي مسایلو په اړه د تصامیمو په برخه کې د پیرصاحب پوهې، لارښوونو او ګټورو نظریاتو ته تر بل هر وخت زیات ضرورت لري. درېغه افغانان په دغسې حساسو شیبو کې خپل یو ملي مشر او جهادي رهبر له لاسه ورکوي.

د مرحوم پیرسیداحمدګیلاني د وفات له امله د ده معززې او روحاني کورنۍ، د افغانستان مجاهد ولس، د ملي اسلامي محاذ مشرتابه او د جناب پیرصاحب پيروانو او علاقمندانو ته د ده د وفات تسلیت وایم او د خدای تعالی په دربار کې خپل دغه قدرمن مشر او جهادي رهبر ته د فردوس جنت دعا کوم.

محمد اشرف غني

د افغانستان د اسلامي جمهوریت رئیس
د جمهور رئیس غني په مشرۍ د ملي امنیت شورا غونډه جوړه شوه
د افغانستان د اسلامي جمهوریت د جمهور رئیس محمد اشرف غني په مشرۍ د ملي امنیت شورا غونډه  نن ماښام په ارګ کې جوړه شوه.

په دې غونډه کې د امنیتي او دفاعي سکتور وزیرانو د هېواد د عمومي امنیتي وضعیت په ځانګړي ډول د هلمند، ارزګان، کندز، فراه، بغلان، فاریاب او کنړ ولایتونو امنیتي وضعیت د ارزولو ترڅنګ د هېواد په بېلابېلو برخو کې د هغو لسګونو نظامي عملیاتو په اړه چې دښمن ته په کې زیات زیانونه اوښتي دي د غونډې ګډونوالو ته معلومات ورکړل.

جمهور رئیس غني د یادو معلوماتو له اورېدلو وروسته د هېواد له امنیتي او دفاعي ځواکونو څخه د دښمن پر ضد د ټولو په ځانګړي ډول د هلمند ولایت په موسی کلا ولسوالۍ کې د خاص عملیاتو د ترسره کولو له امله مننه وکړه او د دوی مبارزه، زړورتیا او سرښندنې یې وستایلې.

ملي امنیت شورا د افغانستان د د فاع په لاره کې د هېواد د امنیتي او دفاعي ځواکونو د قربانیو او اتلولیو د ستایلو په موخه د هېواد د امنیتي او دفاعي ځواکونو د ملي ورځې د نمانځنې مراسمو طرزالعمل (د نښانونو، مډالونو او تقدیرنامو او نغدي مکافاتو په ورکولو سره) چې د امنیتي او دفاعي ارګانونو، حج او اوقافو، اطلاعاتو او فرهنګ، کار او ټولنیزو چارو او عدلیې وزارتونو، د سیمه ییزو ارګانونو خپلواکې ادارې، د ملي امنیت عمومي ریاست استازو څخه تشکیل شوي کاري ټیم د ملي امنیت شورا دفتر سره په همغږۍ ترتیب او تنظیم کړی وو، تصویب  او د عملي کېدو په هکله یې لازم تصمیمونه ونیول شول.

په پای کې  د ننګرهار ولایت دسپین غر ولسوالۍ د برخلیک په اړه چې په ۱۳۷۲ل کال د مستقلې ولسوالۍ په توګه اعلان  شوې، د جمهور رئیس د حکم په اساس د دغې موضوع د ارزونې موظف  پلاوي د خپلو ارزونو راپور د ملي امنیت شورا غونډې ته وړاندې کړ. ملي امنیت شورا له هر اړخیز بحث وروسته د جلا اداري واحد په توګه د هغې ولسوالۍ د ټاکلو په اړه دپلاوي د رئیس او د سیمه ییزو ارګانونو خپلواکې ادارې وړاندیزونه له هر اړخیز بحث وروسته تائید کړل او په دې اړه یې سیمه ییزو ارګانونو خپلواکې ادارې ته لازمې لارښوونې وکړې.

چاپي خپرونې

  • خبرپاڼه
  • مجله
  • ګډون وکړﺉ
faceBook icon twitter icon flicker icon youtube icon

ټولنيز / فرهنګي

د کورنیو چارو وزارت جنايي جرمونو سره د مبارزې لوئ ریاست اړوند د کشف رئیس سمونوال میرعرب شاه چمتو په ...